Business of Soap

 صابن کا کاروبار

آج کے وقت میں زیادہ تر لوگ نوکری کی جگہ خود کے کاروبار پر توجہ دے رہے ہیں ۔ مرکزی حکومت بھی کئی ایسی اسکیمیں شروع کرچکی ہیں ، جس کی مدد سے خود کا کاروبار شروع کیا جاسکتا ہے ۔ اگر آپ ک پاس آئیڈیا ہے اور کم سرمایہ کاری میں خود کا بزنس شروع کرنا چاہتے ہیں تو حکومت کی کئی اسکیمیں آپ کی مدد کرسکتی ہیں ۔ آج ہم آپ کو سرکار کی انہیں اسکیموں کی مدد سے کم لاگت میں خود کا کاروبار شروع کرنے اور موٹی کمائی کرنے کیلئے ایک بزنس کے بارے میں بتا رہے ہیں ۔

 

انتہائی کم لاگت میں آپ چاہیں تو صابن بنانے کی فیکٹری قائم کرسکتے ہیں ۔ آج کے وقت میں صابن کی ڈیمانڈ چھوٹے شہروں سے لے کر بڑے شہروں ، قصبوں اور گاوں میں کافی ہے ۔ ایسے میں صابن بنانے کا کاروبار آپ کیلئے فائدہ مند ثابت ہوسکتا ہے ۔ صابن بنانے کیلئے فیکٹری کی شروعات چار لاکھ روپے سے بھی کم میں کی جاسکتی ہے ۔ اس کے علاوہ اس کاروبار کو شروع کرنے کیلئے 80 فیصدی لون بھی مل سکتا ہے ۔

 

مرکزی حکومت کے مدرا یوجنا کے تحت نہ صرف لون ملنا آسان ہے ، بلکہ پورے بزنس کا پروجیکٹ بھی تیار کیا جاسکتا ہے ۔ کل سات مہینے میں آپ اس کی کارروائی پوری کرکے پروڈکشن شروع کرسکتے ہیں ۔ مدرا اسکیم کی پروجیکٹ پروفائل رپورٹ کے مطابق آپ ایک سال میں تقریبا چار لاکھ کلو کا کل پروڈکشن کرسکیں گے ۔ اس کی کل ویلیو تقریبا 47 لاکھ روپے ہوگی ۔

اخراجات اور دیگر بقایہ جات کی ادائیگی کے بعد آپ کو ہر سال تقریبا چھ لاکھ روپے کا منافع ہوگا ۔ اس حساب سے تقریبا 50 ہزار روپے ماہانہ کی آپ کمائی کرسکتے ہیں ۔ اس یونٹ کو لگانے کیلئے آپ کو کل 750 اسکوائر فٹ زمین کی ضرورت پڑے گی ، جس میں سے 500 اسکوائر فٹ کوورڈ اور باقی کا ایریا ان کوورڈ ہوگا ۔ اس میں مشینوں سمیت کل 8 آلات نصب ہوں گے ۔ مشینوں اور انہیں لگانے کی کل لاگت صرف ایک لاکھ روپے ہوگی ۔

اس پورے سیٹ اپ کو لگانے کیلئے مجموعی طور پر 15 لاکھ 30 ہزار روپے کا خرچ آئے گا ، جس میں جگہ ، مشینری ، تین ماہ کی ورکنگ کیپٹل شامل ہے ۔ اس میں آپ کو صرف تین لاکھ 83 ہزار روپے خرچ کرنے ہوں گے ، کیونکہ باقی کا لون آپ کو بینک سے مل سکتا ہے ۔ اس کاروبار کو شروع کرنے کیلئے لون آپ کو کسی بھی سرکاری یا پرائیویٹ بینک سے مل جائے گا۔